Bayer Leverkusen rrezikon ta mbyllë sezonin pa trofe. Aspirinat janë eliminuar në një mënyrë të befasishme nga Kupa e Gjermanisë. Në gjysmëfinale, kampionët në fuqi të Bundesligës dhe të Kupës, kishin mundësinë e artë për të shkuar në një tjetër finale, por nuk ndodhi kështu. Të besuarit e trajnerit Xabi Alonso, u mundën 2-1 në fushën e skuadrës modeste të Arminia Bielefeld, që konkuron në Ligën e tretë gjermane.
Në Schüco Arena asgjë nuk shkoi sipas planit. Ndonëse aspirinat ishin të parët që kaluan në avantazh në minutën e 17 me anë të mbrojtësit Jonathan Tah, duke krijuar idenë se gjithçka do të ishte e lehtë për vizitorët, në fakt, nuk ndodhi kështu.
Po në pjesën e parë, Arminia përmbysi rezultatin në 2-1 me anë të Ëorl dhe Grosser, epërsi që arriti ta mbante deri në vërshëllimën e fundit.
Në këtë mënyrë, Arminia Bielefeld shkon në finalen e Kupës së Gjermanisë, duke eliminuar nga gara pikërisht kampionët në fuqi të kompeticionit, ndërsa në finalen e 24 Prillit, do të ketë mundësinë të fitojë Kupën e parë në histori.
Sa i përket Leverkusenit, të eliminiuar nga Champions League dhe tani nga Kupa e Gjermanisë, ekipi i drejtuar nga Xabi Alonso rrezikon ta mbyllë sezonin pa trofe, duke qenë se edhe në kampionat, qëndron 6 pikë prapa kryesuesve të Bayern Munich.
