Zinedine Zidane (trajneri i Real Madrid): “Tifozët do të luajnë një rol të rëndësishëm për ne. E dimë që nuk e nisëm në mënyrën më të mirë rrugëtimin tonë në ‘Champions League’, por kemi sërish shansin për t’u dhënë diçka tifozëve tanë, ata e meritojnë. Por na duhet edhe pikë gjithashtu. Mendoj se kemi nevojë të tregojmë soliditet dhe forcë edhe në çastet kur nuk kemi topin në zotërim. Kur e kontrollojmë lojën, na lind detyra për të krijuar sa më shumë raste. Nuk duhet të harrojmë se ndeshja e sotme është e një rëndësie të madhe për ne, prandaj nuk na lejohen gabimet. E vetmja gjë që duam është fitorja, por për momentin jemi në vendin e katërt, diçka që duhet ta ndryshojmë sa më shpejt. Nuk dua të shtoj presionin mbi lojtarët e mi, por nuk jemi në një situatë të mirë, që të kemi luksin t’i marrim gjërat shtruar. Duhet të veprojmë sa më shpejt dhe pres një reagim në këtë ndeshje me Club Brugge.”
Eden Hazard (sulmues i Real Madrid): “E di që njerëzit presin shumë prej meje, por edhe unë jam si ata. Unë jam kritikuesi më i madh i vetes sime. Jam duke punuar shumë fort çdo ditë që të arrij të ndihmoj skuadrën sa më shumë. Do të arrijmë gjëra të mëdha, pasi kemi një nga ekipet më të mira. Club Brugge është një skuadër e mirë, që kryeson kampionatin e saj. Kur sheh që kanë lojtarë si Mignolet, kupton që kanë edhe individë që mund të na hapin shumë probleme. Nuk e shohim aspak të lehtë këtë takim, por kemi besimin dhe vendosmërinë për të bërë gjëra të mëdha përpara publikut tonë.”
