Janë disa nga lojtarët më të njohur dhe më të spikatur të skuadrave respektive, por ja që çështja kontraktuale me klubet e tyre i ka kthyer në personazhe mediatike. Kështu Aaron Ramsey ka vendosur të mos e ripërtërijë kontratën dhe menjëherë të kthehet në njeriun më të lakmuar të merkatos. Juventus u tha se u interesua fillë për të, por paga e majme e kërkuar nga uellsiani mund të përballohet vetëm nga Manchester United, klub i cili thuhet se po e monitoron prej javësh. Po te United e njëjta situatë duket me kapitenin Antonio Valencia, tashmë i pa-përfshirë në planet e Jose Mourinhos. 33-vjecari mund të shohë që në janar për alternativat, njëjtë sikurse edhe Dembele te Tottenhami.
Mesfushori belg u kërkua shumë nga Interi gjatë verës, por zgjodhi ta provojë edhe njëherë bindjen e klubit londinez, gjë që duket se nuk ka shkuar mbarë. David De Gea është ndër emrat më të njohur nga kjo listë lojtarësh. Kontrata edhe atij i mbaron në qershor 2019-të. Dikur e kërkonte Reali i Madridit, por tashmë në horizont është vetëm PSG e pasigurt nga mosha e Buffon apo përvoja e pakët e Areolas. Gjithesi në rastin në fjalë Manchester United thuhet se po përpiqet ta bindë për ripërtëritje. 27-vjecari mund të kthehet shpejt ndër më të paguarit e skuadrës, në të kundërtën gjërat mund të trazohen ndjeshëm nëse edhe ai vendos të largohet me parametër zero.
