Që pas humbjes së kapitenit të tyre, Davide Astori, drejtuesit e Fiorentinës janë duke menduar prej kohësh për një futbollist, i cili do të zëvendësojë italianin në mbrojtjen e skuadrës vjollcë. Dhe sipas asaj që raportojnë mediat italiane, midis alternativave që po shqyrtohen nga krerët e skuadrës “vjollcë” është edhe një shqiptar, si Frederik Veseli.
Ai aktualisht luan në “Serie B” me fanellën e skuadrës së Empolit, teksa ka qenë mjaft konstant me paraqitjet e tij në radhët e toskanëve. Mbi të gjitha, mbrojtësi kuqezi është shndërruar në një titullarë të padiskutueshëm te skuadra kryesuese e Serisë B italiane, e cila ka gjasa të mëdha që sezonin e ardhshëm sërish të kthehet në elitën e futbollit përtej Adriatikut. Veseli po shkëlqen në qendër të mbrojtjes, megjithëse karrierën e ka nisur duke luajtur në krahët e këtij reparti.
Në një rol të tillë ai aktivizohet edhe me përfaqësuesen shqiptare, duke bindur Panuçin t’i besojë një fanellë titullari përpara emrave të tjerë si Ajeti, apo Gjimshiti që luajnë një kategori më lart se ai në futbollin italian. Tek Empoli, Veseli gjatë këtij sezoni ka qenë ndër futbollistët më të aktivizuar, ku nga 29 ndeshjet e zhvilluara të skuadrës së tij, ai ka qenë në fushë për 90 minuta në 25 prej tyre. Me paraqitjet e tij ka lënë përshtypje të mirë edhe te skuadra vjollcë e Serisë A.
Për momentin është thjesht një nga hipotezat e merkatos së Fiorentinës, ndërkohë që çdo diskutim konkret mund të nisë të bëhet vetëm gjatë muajve të merkatos verore.
