Ashtu sikurse kishte paralajmëruar Louis van Gaal, Manchester United, e fitoi 3-1 përballjen me Liverpool-in, por vëmendja kryesore nuk shkoi te holandezi. Ishte debutimi me një gol fantastik i 19-vjecarit Anthony Martial, ai i cili mori gjithcka nga një takim tejet i rëndësishëm në Premier-League.
Sulmuesi që u transferua ditën e fundit të merkatos për shifrat e 50 milionë eurove nga Monaco, vulosi debutimin e tij me një gol që mbylli takimin, por edhe kritikat në lidhje me shumën e majme që United pagoi për shërbimet e tij.
Gjithcka ndodhi pak pas minutës së 84’-ët kur sulmuesi i Liverpool-it, Christian Benteke realizoi një gol fantastik me roveshatë, gol që u duk se e rihapi takimin, pasi rezultati shkoi në 2-1.
Por për të mbyllur çdo gjë mendoi Martial, i cili bëri gjithcka vetë dy minuta pasi “Reds”-at kishin shënuar. Goli solli një entuziazëm të pamasë në Old Trafford, aty ku tashmë një yll i ri sapo ka lindur.
