Pak kohë më parë, hetimet rreth klubit të PSG për shkelje të rregullave të ‘fair-play’ financiar u mbyllën në favor të kampionëve të Francës. Shpenzimet marramendëse për të afruar në skuadër emra si Neymar apo Mbappe Lottin, vunë në lëvizje autoritete përkatëse për kontrollin e bilanceve të skuadrës franceze, por edhe të mënyrës së realizimit të këtyrë transaksioneve. Megjithatë, presidenti Al-Khelaifi do të dilte i buzëqeshur nga zyrat e ‘Dhomës së Hetimit’ në Nyon të Zvicrës, duke thënë se çdo gjë ishte brenda rregullave.
Por situata është marrë në dorë tashmë nga vetë UEFA. Presidenti Ceferin, i mbështetur edhe nga komisioni qëndror i institucionit më të lartë të futbollit evropian, ka kthyer edhe njëherë çështjen PSG në ‘Dhomën e Hetimit’, ku kësaj radhe, do të ketë edhe përfaqësues të zgjedhur nga vetë UEFA për të mbikëqyrur hetimin nga afër. Kampionët e Francës përdorën formulën e huazimit dhe atë të prishjes së kontratës për transferimet e Mbappe dhe Neymar. Që të dy së bashku i kushtuan arkave të klubit francez plot 402 milionë euro. Duke përdoru huazimin, drejtuesit e PSG morën kohë për të shitur lojtarë si Gonçalo Guedes, Javier Pastore, apo Odsonnë Edouard, që gjithësesi e mbajnë UEFA-n skeptike rreth respektimit të rregullave të ‘fair-play’ financiar.
