Pas përmbylljes edhe të fazës së të tetave, UEFA ka hedhur për votim golat më vendimtar që diktuan kualifikimet për disa nga skuadrat pretendente, por jo vetëm. Kështu në listën e 5 golave të përzgjedhur gjenden realizimet e Neymar, Pulisic, Douglas Costa, Theo Walcott dhe Marc Albrighton. UEFA thekson se kjo përzgjedhje është bërë duke analizuar performancat individuale të secilit lojtar dhe peshën e tyre në çdo përballje. Kështu goli që duket se do jetë më i votuari është ai i Neymarit. Braziliani shënoi me një goditje dënimi në minutën e 88-të gjatë përmbysjes fantastike 6-1 që Barcelona arriti ndaj PSG në Camp Nou. Goli i tij rindezi shpresat për kualifikim dhe mbetet ndër më vendimtarët e kësaj faze. Pas Neymarit, vjen realizimi i Marc Albrighton për Leicester City. Përballë Sevillas në King Power, 27-vjecari realizoi golin e kualifikimit përmes një goditje brenda zonës së rreptësisë. Nuk ishte i bukur sa i Neymarit, por rëndësia e këtij goli kishte të njëjtën vlerë sikurse ajo e brazilianit. Në listë vjen goli i brazilianit tjetër Douglas Costa me Bayernin e Munich-ut. 26-vjecari ishte i pa-mëshirshëm në fitoren e dytë 5-1 ndaj Arsenalit duke vulosur një gol fantastik në minutën e 78-të. Nga kjo sfidë në garë për golin e fazës së të tetave është edhe realizimi i Theo Walcott. Anglezi shënoi në minutën e 20-të duke dhënë iluzionin se topcinjtë mund të shpresonin për një fitore ngushëlluese ndaj bavarezëve. Për ta përmbyllur këtë listë është goli i talentit të Dortmundit, kroato-amerikanit Pulisic, i cili shënoi në fitoren 4-0 ndaj Benficas, duke festuar më së miri rritjen në nivel që ka gëzuar ai këtë sezon.
