Cristiano Ronaldo tek Juventus është goditja e merkatos, për të cilën flasin të gjithë. Pritja për ta shikuar portugezin në aksion me fanelën bardhezi shtohet dita-ditës. Mbi këtë lëvizje të bërë nga “Zonja e Vjetër” ka folur edhe Xhovani Trapatoni, një ish-trajner i bardhezinjve dhe Italisë, megjithëse si futbollist është rritur tek Milani. “Vetëm një klub si Juventus, me ambicjen e familjes Anjeli dhe historinë e tij fituese, mund të tërhiqte në Itali një As si Cristiano Ronaldo. Një kampion, që për më tepër, luante edhe më parë në një skuadër të madhe si Real Madrid, i aftë për të fituar tre Champions League radhazi”, ka deklaruar fillimisht Trap. Mbi të gjitha ai ka theksuar se një si Ronaldo, përveç Juventusit, mund të ndihmojë së tepërmi për të kthyer madhështor imazhin e futbollit italian. Ndërsa duke dalë në detaje tekniko-taktike, ish-trajneri i Juventusit të viteve ’80 ka pranuar se Ronaldo mund të rezultojë për Allegrin, njësoj siç ishte Platini për atë në kohën kur francezi luante me bardhezinjtë. “Bëhet fjalë për kampionë absolutë, për fitues të disa “Topave të Artë”. Mishel ishte vërtet fantasik dhe unik në llojin e tij. Në fushë shikonte veprime që unë nga stoli as që i imagjinoja”, ka rrëfyer Trapatoni.
Ai ka edhe një përgjigje, për ata që thonë se Ronaldo është i vjetër në moshë: “I tillë është dikush që me kohën humbet disa cilësitë… Për shembull, kush nuk ka më një dëgjim të mirë! Përkundrazi, Ronaldo i sezonit të fundit me Realin e Madridit dhe ai i Botërorit me Portugalinë ka shfaqur një superfuqi atletike. E madje më duket se ka edhe një shënjestër të mirë. Eshtë një nga ata që gjuan dhe shënon shumë gola. Sigurisht që do të jetë një shigjetë më shumë në harkun e Allegrit”, ka shpjeguar ish-trajneri.
Tashmë me ardhjen e CR7, bardhezinjtë janë favoritë për të fituar Champions League. Por sipas Trapatonit, nuk duhet thënë asgjë që tani në fillim. Edhe sepse bëhet fjalë për një kompeticion të vështirë e të paparashikueshëm, ku janë në garë skuadra të mëdha angleze, gjermane e spanjolle, me tepër ambicje. Por sipas Trap, Juventusi në vitet e fundit ka arritur dy herë në finale dhe me një Ronaldo plus, sigurisht që ka më shumë mundësi për të mbërritur deri në fund e të kënaqë tifozët.
