Hansi Flick, trajneri i Bayern:
“Më duhet të komplimentoj punën e Frank Lampard. Ata kanë një skuadër të re dhe janë vërtet të lirë në lojën e tyre. Kundërsulmojnë shpejt dhe shohin gjithnjë shanset e tyre për të shënuar. Janë një skuadër që mund të na vendosë vërtet nën presion, sidomos në një takim që luhet në ‘shtëpinë e tyre’. Veç sfidës me Leipzig në kampionat, ne kemi shënuar thuajse në çdo takim. Kemi qenë mirë në këtë aspekt. Shpresoj që të bëjmë të njëjtën gjë edhe në këtë takim të sotëm, pasi do të kishte vlera të veçanta për ne. Duke parë karakteristikat e kundërshtarit, pres një ndeshje me ritëm shumë të lartë dhe me raste të shumta, por besoj se mënyra se si do të finalizohen do të jetë deçizive. Lewandowski është në formën e tij më të mirë dhe kjo gjë është një garanci për ne. Ai shton besimin e skuadrës dhe ka ndihmuar gjithmonë me golat e tij. Shpresoj që kjo gjë të vazhdojë edhe me Chelsean. I kemi shanset për të bërë mirë dhe do të përpiqemi t’i shfrytëzojmë në maksimum.”
Joshua Kimmich, mesfushor i Bayern:
“Chelsea ka disa lojtarë interesantë. Janë një përzierje mes të rinjve të talentuar dhe lojtarëve me eksperiencë që kanë fituar jo pak. Pres një atmosferë mjaft të bukur në stadium, por është e rëndësishme që ne të mos dorëzohemi përpara presionit të tifozëve të tyre, apo edhe të lojtarëve në fushë. Duhet të luajmë me të njëjtin besim që kemi shfaqur deri më tani dhe në këtë mënyrë do të marrim rezultatin që duam. Të fitosh ‘Champions League’-ën është një ëndërr e madhe për të gjithë. Besoj se Bayern i ka të gjithë elementët e duhur për të arritur diçka të tillë. Kjo ndeshje është një provë e mirë për të kuptuar se çfarë kemi përmirësuar nga sezoni i shkuar. Do të bëjmë më të mirën.”
