Ndonëse kishte përballë një kundërshtar jo të lehtë si Benoit Paire, Roger Federer ia ka dalë mbanë të kalojë në raundin tjetër të ‘US Open’. Zviceriani fitoi 3-0 me setet brenda dy orëve lojë, ku edhe njëherë tjetër u tregua i kujdesshëm për gjendjen e tij fizikë. Kështu Federer, në secilin set, u mjaftua t’i merrte kundërshtari nga një ‘game’ në shërbimet e tij. 37-vjeçari do të përballet në raundin e 1/16-ave me australianin Nick Kyrgios, që pritet ta vërë Federer mjaft në vështirësi. Kalon më tej edhe Novak Djokoviç, që mundi 3-1 amerikanin Tennys Sandgren. Sfida zgjati 2 orë e 48 minuta, dhe Djokoviç mund t’i kishte kursyuer vetes energji nëse do të fitonte sfidën me ‘tie-break’ në setin e tretë të ndeshjes, që shkoi për amerikanin Sandgren.
Gjithësesi numri 6 i botës u korrigjua në setin e katërt, të cilin e mbylli brenda 33 minutash lojë, me rezultatin 6-2. Fitoren më të lehtë të turneut e mori Marin Cilic, që shkatërroi në 3 sete kundërshtarin e tij, Hubert Hurkacz. 6-2, 6-0 dhe sërish 6-0 ishin shifrat e këtij takimi, që panë dukshëm kroatin Cilic dominues. Ndërsa tek femrat, Maria Sharapova vazhdon të mos zhgënjejë teksa mposhti 2-0 me shifrat 6-2 dhe 7-5, rumunen Cirstea. Një sfidë e lehtë për tenisten ruse, që në raundin tjetër do të vihet përballë letonezes Jelena Ostapenko. Fitore edhe për kampionen e këtij turneu në vitin 2016, Angelique Kerber, që kaloi 2-1 suedezes Johanna Larsson. Surpriza e radhës ishte eleminimi i Caroline Wozniacki, që u mposht 2-0 nga tenistja ukrainase Tsurenko.
