Ishte fare afër një emri të madh në futbollin italian e jo vetëm, sic është Milani. Mirëpo si përfundim, Igli Tare mori vendimin për të vazhduar detyrën e tij në rolin e drejtorit sportiv të Lacios, fituese të Kupës së Italisë. Ish-sulmuesi i kombëtares shqiptare ka shpjeguar për mediat përtej Adriatikut arsyet pse refuzoi ofertën kuqezi. “E pranoj që ishte nder që Boban e Maldini u interesuan për mua. Bëhet fjalë për dy personalitete që i kam vlerësuar shumë si kundërshtarë në fushë dhe tani ne rolin që kanë si drejtues. Pata mundësinë të bisedoj me të dy dhe e kuptova se Milani është jeta e tyre. E pranuan refuzimin tim me respekt të madh, pasi e dinin që për mua do të kishte qenë shumë e vështirë të hidhja një hap të tillë. Por do të thoja se nuk mendoj që refuzimi ndaj Milanit do ta kushtëzojë karrierën time.
IGLI TARE
(tedeschi(
Thjesht nuk ekzistonin kushtet e duhura për të shkuar aty. Fundja kam 15 vjet te Lazio dhe qëndrimi ishte një akt dashurie kundrejt këtij klubi”, kanë rrëfimi i Tares. Ndër të tjera, drejtori sportiv bardhekaltër ka folur edhe për të ardhmen e Milinkovic-Savic, një prej lojtarëve më të kërkuar në skuadrën e Lacios. Tare ka pranuar se e ka të vështirë të thotë nëse serbi do të vazhdojë të luajë me fanelën bardhekaltër, megjithëse së fundi ka rinovuar kontratën. Ai ka thënë gjithsesi që vetëm nëse vjen ndonjë ofertë e parefuzueshme, do të merret në konsideratë nga ana e tij dhe e presidentit lacial, Claudio Lotito. Ndërsa në lidhje me objektivat që ka Lacio në sezonin e ri, Tare ka pohuar se primare do të jetë arritja në zonën e Champions League, çka nuk është një mision i pamundur nëse do të vijohet me përforcimet e duhura të skuadrës ekzistuese.
