Sfida me Skocinë ishte sërish pa kapitenin Ansi Agolli në fushë. Prezent në konferencën për shtyp përpara ndeshjes, por jo në përballje, mungesa e përvojës së tij në krah solli mjaft probleme për grupin e Panuccit. Binaku dhe më vonë Prenga vuajtën shumë shpejtësinë e Russell, McGregor apo dhe Naismith. Ndërkohë në mesin e fushës, Emanuele Ndoj rezultoi shpesh i humbur në duelet direkte me McDonald apo McGinn. Ashtu sikurse ndaj Izraelit, edhe në Skoci Shqipëria vuajti për të krijuar volum loje.
Gafat në prapavijë ishin pothuajse të njëjta dhe kësaj here as rezultati nuk foli në favor. Ndërkohë për Christian Panuccin fitorja ishte e dhuruar. Ish-mbrojtësi i kombëtares italiane tha se e kishte përgatitur mirë takimin. Ai theksoi se edhe Shqipëria pati raste për të shënuar, por që nuk i shfrytëzoi si duhet. Këtu Panucci iu referua dy mundësive që kishte Balaj. Panucchi justifikoi mungesën e Bashës dhe mori përgjegjësinë për lënjen e tij në stol, teksa këmbënguli se problemi i vetëm për kuqezinjtë mbetet mbrojtja. Në pesë ndeshjet e fundit, kuqezinjtë kanë pësuar 10 gola. Nga kjo ecuri, fitorja ndaj Izraelit rezulton e vetmja përballje me rrjetë të paprekur.
