Pak pasi kreu vizitat mjekësore tek Milan, u konfirmua se argjentinasi do të mbajë në fanellë numrin 9. Një numër i rëndësishëm për historinë e klubit kuqezi, por që në vitet e fundit nuk ka gjetur një mbajtës të denjë të tij. Për këtë transferim të Higuain tek Milan ka folur edhe legjenda e klubit kuqezi, Andriy Shevchenko.
Ukrainasi është shprehur se kalimi i Caldaras dhe Higuain tek Milan do të forcojë ndjeshëm cilësinë në skuadrën e drejtuar nga Gattuso. Në intervistën e dhënë për “La Gazzetta dello Sport”, Shevchenko thotë se nëse do të ketë motivimin e duhur, Higuain mund të bëjë diferencën dhe të jetë njëriu që mund të spostojë ekuilibrat. Sipasi tij, argjentinasi garanton gola dhe rolin e një bomberi, diçka që Milanit i ka munguar prej disa sezonesh.
Fituesi i “Topit të Artë” në vitin 2004 është ngacmuar edhe rreth një rikthimi të mundshëm të tij tek skuadra e zemrës, por Shevchenko është përgjigjur se për momentin është i fokusuar në detyrën që ka tek kombëtarja e vendit të tij, por që në të ardhmen do pëlqente shumë të ishte pjesë e skuadrës me të cilën ai fitoi aq shumë në karrierën si futbollist.
