Sido që të përfundojë ky sezon futbollistik për Milanin, disa largime në verë, duken të pashmangshme nga kuqezinjtë. Mediat italiane, nënvizojnë se do të jenë plot 5 lojtarë, të cilët do të ndajnë rrugët me klubin 19 herë kampion të Italisë.
3 prej tyre do të largohen me parametra zero, ndërsa 2 të tjerëve u përfundon huazimi. Tatarusanu, Mirante dhe Zlatan Ibrahimoviç janë në dy muajt e fundit të marrëveshjeve të tyre aktuale, e si pasojë po bëhen gati të paketojnë valixhet nga “San Siro”.
Ndërsa për mbrojtësin Dest, ndonëse u krijuan pritshmëri kur zbarkoi në Milano, anësori I djathtë I prapavijës, ka qenë thuajse I padëshiruar nga trajneri Stefano Pioli, e kësisoj, amerikani do të rikthehet në “Camp Nou”. E njëjta gjë mund të thuhet edhe për mesfushorin Bakayoko, pronësinë e të cilit e ka Chelsea.
Sa I përket situatës momentale të Milanit, duhet thënë se ajo është me të vërtetë kritike. Me 3 javë nga fundi I kampionatit, klubi kuqezi rrezikon të mbetet pa futboll të Champions League në edicionin tjetër. E nëse kjo ndodh, atëherë financat e klubit do të dobësohen jo pak, çka do të thotë se edhe investimi në merkaton e verës që po vjen, mund të jetë me pikatore.
