Interi i ka bërë një mbyllje spektakolare javës së 14-të të Serie A. Zikaltërit pritën në shtëpi skuadrën e Bolognas, ndaj të cilëve triumfuan me rezultatin e thellë 6-1.
Fillimisht në San Siro pati heshtje, sepse në minutën e 22-të, Lykogiannis kaloi vendasit miqtë në avantazh, por kjo epërsi do të zgjaste vetëm 4 minuta, kur Edin Dzeko, me një finalizim mjaft të bukur riktheu gjithçka në barazpeshë, duke prekur një pjesë të historisë së klubit.
Në moshën 36 vjeç e 237 ditë, Dzeko tashmë ka kaluar Giuseppe Meazzan, me 36 vjeç e 233 ditë, duke u bërë në këtë mënyrë lojtari i dytë më i vjetër që shënon për Interin në Serie A. Në vend të parë është Sinisa Mihajloviç, 37 vjeç e 47 ditë.
Më tej, përpara sr të mbyllej pjesa e parë, Dimarco dhe Lautaro Martinez do ta dërgonin rezultatin në 3-1 për të zotët e shtëpisë.
Kur nga fraksioni i dytë kishin kaluar vetëm 3 minuta, do të ishte sërish Dimarco ai që do të shënonte golin e radhës për Interin. Në 10 vitet e fundit, Dimarco është vetëm mbrojtësi i dytë që shënon një dygolësh për Interin në Serie A. një gjë të tillë përpara tij e ka bërë vetëm Achraf Hakimi në 5 dhjetor të 2020-tës, pikërisht ndaj të njëjtit kundërshtar, Bolognas.
Më pas, në të 59-tën, do të ishte radha e Hakan Çalhanoglu që do të shënonte të 5-tin për skuadrën e Simone Inzaghit. Kjo është hera e 5-të që mesfushori shënon dhe asiston brenda një ndeshje për Interin në kampionat dhe që prej momentit kur turku është bashkuar me ekipin zikaltër, vetëm Luis Muriel e gëzon një statistikë të tillë. Asnjë lojtar tjetër në Serie A nuk ka mundur t’i arrijë dot këto statistika.
Në fund, në të 76-tën. Robin Gosens shënoi dhe golin e 6-të për nënkampionët e Italisë, të cilët, tashmë janë ngjitur në kuotën e 27 pikëve.
Ky rezultat i thellë i Interit, mund të shërbejë njëkohësisht edhe si një mesazh për rivalët, qoftë për zonën Champions, por gjithashtu edhe në garën për titullin kampion. Ndonëse Napoli është 11 pikë larg, sezoni është shumë i gjatë dhe gjithçka mund të ndodhë.
