San Antonio Spurs kanë marrë një fitore shumë të rëndësishme, përballë një prej kundërshtarëve më të fortë të këtij sezoni nga ‘Konferenca e Lindjes’, Miami Heat. Teksanët triumfuan në këtë ndeshje me rezultatin e ngushtë 107-102, ku iu falën performancave të mira të dy yjeve kryesorë të skuadrës, LaMarcus Aldridge dhe DeMar DeRozan, të cilët realizuan së bashku 41 pikë. DeRozan madje ishte pranë realimit të një ‘triple-double’, pasi veç 20 pikëve, shërbeu 9 asiste dhe fitoi po 9 duele për zotërimin e topit nën tabelë. Tek Miami ndërkohë më i miri ishte Adebayo, që e mbylli takimin me 21 pikë, 6 asiste dhe 16 rikuperime të topit nën tabelë. Lojtarët e Heat morën avantazhin në periodën e parë me rezultatin e pjesshëm 31-28. Por Spurs do të kthenin çdo gjë në favorin e tyre menjëherë pas periodës së dytë, me Aldridge dhe DeRozan që morën nën kontroll sfidën. Kjo ishte fitorja e 18 për San Antonion në këtë sezon, çfarë e mban pranë zonës ‘play-off’.
Ka rezultuar një sfidë mjaft e bukur përballja mes Denver Nuggets dhe Indiana Pacers, që përfundoi me fitoren e këtyre të fundit me rezultatin 115-107. Shënuesi më i mirë i takimit në fakt ishte lideri i Denver, Nikola Jokiç, që e mbylli me 30 pikë, por dha kontributin e tij edhe me 10 rikuperime të topit nën tabelë. Megjithatë, plot 4 lojtarë të Indianës realizuan mbi 20 pikë, me lojtarin lituanez, Domantas Sabonis, i cili ishte pranë realizimit të një ‘triple-double’-i me 22 pikë, 15 asiste dhe 9 rikuperime të topit nën tabelë. Takimi në fakt u dominua nga lojtarët e Denver Nuggets, por Indiana ia doli të bënte përmbysjen e madhe në periodën e fundit të takimit, që e fituan me rezultatin e thellë të pjesshëm 41-26. Kjo ishte fitorja e pestë radhazi për skuadrën e Pacers, që mbeten në zonën ‘play-off’ në ‘Konferencën e Lindjes’, teksa për Nuggets, kjo humbje ishte e 13-a për këtë sezon.
