Nuk mbarojnë lajmet negative për Real Madrid. Pas dëmtimit të Antonio Rudiger, lojtari i radhës që është dëmtuar në kampin madrilen, është David Alaba. Sipas raportimeve nga mediat spanjolle, mbrojtësi autriak ka pësuar një tërheqje muskulore dhe si pasojë, parashikohet të qëndrojë jashtë fushave të lojës, për një periudhë 3 javore. Kjo do të thotë, se Alaba, nuk do të jetë i gatshëm në disa prej ndeshjeve më të rëndësishme sezonale që Reali do të luajë përgjatë ditëve të ardhshme. Si fillim, në fundjavë, kampionët e Spanjës do të luajnë ndaj Atleticos, duel i vlefshëm për La Ligan, ndërsa në mesjavë, do të jetë dueli ndaj Manchester Cityt në UCL. Ndërkohë, Alaba mund të konsiderohet pa fat, sepse shtatlarti i prapavijës, sapo ishte rikthyer nga një dëmtim i rëndë në gju, që e mbajti atë jashtë fushave të lojës, për më tepër se një vit.
Në kushte si këto, me Militaon, Rudiger dhe Alaban të dëmtuar, i vetmi mbrojtës qendre që Real Madrid ka në dispozicion, është Raul Asencio, i cili është afruar përgjatë këtij sezoni nga ekipet zinxhir të akademisë. Në rrethana si këto, trajneri Carlo Ançelotti, është i detyruar t’i kthejë sytë sërish nga academia. Ashtu sikurse e ka deklaruar vetë në konferencën mediatike, Ançelotti ka thënë se ai do të përfshijë në ekip një tjetër mbrojtës të akademisë, sikurse është Jacobo Ramon.
