“Nuk e imagjinoj dot Cristianon të shkojë në ndonjë skuadër tjetër” – kështu është shprehur Zinedine Zidane përpara sfidës me Leganes në Copa del Rey. Trajneri francez ka thënë të tijën për spekulimet e shumta që kanë trazuar aktualisht ambientin Los Blancos edhe pse duke mos dashur të përqendrohet në çështjet kontraktuale. Ronaldo është thënë se kërkon të largohet nga Reali, ndërsa madrilenët mendohet se po planifikojnë një marrëveshje me PSG për të sjellë Neymarin në Bernabeu, sipas një projekti ndryshimi rrënjësor të skuadrës ku janë përmendur edhe emrat e Benzemasë dhe Gareth Bale-it. Por për sa i përket Ronaldos, sipas Zizou-së, ai është në klubin e tij, aty ku portugezi duhet të jetë dhe s’e imagjinon dot që ai të luajë diku tjetër, kjo pasi në Madrid të gjithë e duan dhe ai duhet thjesht të përqendrohet te loja dhe në asgjë tjetër. Për 32-vjecarin ky duket të jetë një sezon i vështirë. Edhe pse fitoi të gjitha trofetë e mundshëm individualë dhe ndërkombëtarë, forma e tij ka qenë dëshpëruese në La Liga. Në 14 takime ai ka shënuar vetëm 4 gola ndërsa rivali i tij Leo Messi ka shënuar plot 17. Përballë kësaj gjendjeje që ka Reali, ku ka mbetur 19 pikë prapa Barcelonës në kampionat, Zidane ka dhënë një këshillë për Ronaldon. Ai ka thënë se kur ishte futbollist në momentet e vështira thjesht përqendrohej te puna dhe përkushtohej edhe më tepër te stërvitja dhe te skuadra, pasi sikurse thotë francezi, vetëm kështu sukseset mund të rivijnë shpejt.
