Paulo Dybala mund të largohet nga Juventus. Ylli argjentinas mund të bëjë një lëvizje të papritur gjatë kësaj merkatoje verore, pasi siç raportojnë mediat italiane, për shërbimet e tij është interesuar shumë së fundmi edhe Real Madrid. Eleminimi nga ‘Champions League’-a, ku u mposhtën edhe në ndeshjen e kthimit nga Manchester City 2-1, ka bërë që madrilenët t’i rikthehen merkatos me emra të mëdhenj. Presidenti Florentino Perez duket se e ka bërë zgjedhjen e tij, që pëlqehet edhe nga ana e trajnerit Zinedine Zidane. Por për të shkëputur Dybalan nga Juventusi nuk do të jetë një mision i lehtë. Argjentinasi u shpall së fundmi lojtari i vitit në ‘Serie A’ dhe gëzon mbështetjen e drejtuesve dhe të tifozëve të Juventus. Megjithatë, Dybala nuk e përjashton mundësinë për të nisur një aventurë të re në karrierë, sidomos pas eleminimit të radhës nga ‘Champions League’-a, edhe pse përballë kishin një kundërshtar më të lehtë në letër si Lyon. Sa i përket Real Madrid, ‘los blancos’ janë duke bërë gati ofertën e tyre, që duhet të përmbushë kërkesat prej 100 milioën eurosh që supozohet të kenë drejtuesit e Juventus për kartonin e Paulo Dybalas. Madrilenët janë gati të përfshijnë në këto tratativa edhe njëri mes Isco dhe Toni Kroos. Kartoni i 28-vjeçarit spanjoll vlerësohet në 60 milionë euro dhe largimi nga Real Madrid është një lëvizje e mundur, duke parë që Isco nuk ka patur minutat që dëshiron. Ndërsa Kroos, tanimë 30-vjeçar, vlerësohet në 50 milionë euro dhe për Juventusin do të ishte një përforcim më i mirë, megjithatë gjermani pëlqehet shumë nga trajneri Zidane dhe largimi i tij duket i komplikuar. Nuk duket të jetë problem që Reali të paguajë me para pjesën e mbetur të shumës për Dybalan. Juventus është i prirur për të refuzuar ofertat që mund të vijnë për Paulo Dybalan, megjithatë, largimi i Sarrit mund të bëjë që drejtuesit e torinezëve të kenë një tjetër qasje sa i përket merkatos dhe përgatitjeve për sezonin e ardhshëm, ku në krye të ekipit tani ështe vendosur legjenda e futbollit italian, Andrea Pirlo.
