Manchester City ia doli të përmbyste Real Madrid dhe të merrte një fitore me shumë peshë në ‘Bernabeu’, në sfidën e parë të fazës së 1/8-ave në ‘Champions League’. Triumfi i anglezëve në Madrid është absolutisht një rezultat historik, por që prodhoi edhe shumë rekorde të reja në librat e ‘UEFA Champions League’.
Pep Guardiola u bë vetëm trajneri i dytë që arrin të fitojë 2 transferta ndaj Real Madrid në këtë kompeticion, diçka që më parë është arritur vetëm nga Ottmar Hitzfeld. Gjithashtu, tekniku katalanas është bërë zyrtarisht edhe trajneri që ka fituar më shumë ndeshje në fazën me eleminim direkt të ‘Champions League’, 28 të tilla, duke parakaluar emra të mëdhenj të këtij sporti, si Carlo Ancelotti, Jose Mourinho dhe Sir Alex Ferguson.
Përmbysja që ‘citizens’ realizuan në ‘Bernabeu’ tregon shumë për problemet e këtij Reali. Manchester City u bë vetëm skuadra e dytë në historinë e këtij kompeticioni që ia del të mposhtë ‘los blancos’ në transfertë, edhe pse madrilenët kishin shënuar golin e parë. Më parë, këtë e kishte realizuar vetëm skuadra e Milanit në tetor të 2009-ës. Isco ishte ai që krijoi iluzionin se ‘los blancos’ do të siguronin një tjetër triumf të madh, në atë që ishte goli i parë në ‘Champions’ për lojtarin spanjoll që nga shtatori i 2018-ës kundër Romës.
Sergio Ramos regjistroi ndeshjen e 124-t si titullar në këtë kompeticion, duke kaluar Gianluigi Buffon. Por kjo arritje e kapitenit të Real Madrid u njollos me kartonin e katërt të kuq që ai merr në ‘Champions’, duke barazuar Ibrahimovic dhe Edgar Davids si më të ndëshkuarit. Tek Manchester City, Gabriel Jesus shënoi golin e pestë në këtë edicion. Të gjithë këto kanë ardhur në transferta dhe në këtë sezon më mirë se ai në ndeshjet larg ‘shtëpisë’ kanë bërë vetëm Leëandoëski dhe Gnabry të Bayern Munich. Në fund, ylli i mbrëmjes ishte Kevin de Bruyne me një gol dhe një asist. Belgu gjeti rrjetën për herë të 50 për fanellën e City-t dhe ia doli për herë të parë të shënojë dhe të asistojë në të njëjtën sfidë të ‘Champions League’-ës.
