Real Madrid kualifikohet në finalen e Kupës

Sport

Real Madrid kualifikohet në finale të Kupës së Spanjës. Në gjysmëfinale, Los Blancos, eliminuan ekipin e Real Sociedad, por baskët rezultuan një kockë shumë e vështirë. Pasi merenguez kishin fituar 1-0 në San Sebastian, sfida e dytë, mendohej se nuk do të ishte shumë e vështirë për kampionët në fuqi të Spanjës.

Në Santiago Bernabeu, tifozët do të ishin dëshmitarë të një ndeshjeje spektakolare, që në totalin e saj prodhoi 8 gola, pasi rezultati final do të ishte 4-4. Pra, në totalin e të dyja ndeshjeve, Reali fitoi 5-4 dhe kjo gjë i garantoi skuadrës së Carlo Ançelottit finalen e Kupës së Spanjës, për të dytën herë në 3 sezonet e fundit. Kjo është hera e 42 në histori që Reali paraqitet në finalen e Kupës, ndërsa në total, ka arritur të fitojë 21 trofe.

Në shekullin e 21, Sociedad ka mundur të shënojë 4 gola ndaj Realit, në 3 raste të ndryshme në Santiago Bernageu. Në këtë drejtim, vetëm Barcelona ka mundur të bëjë më mirë, me 5 raste të ndryshme të shënuar nga 4 gola.

E pikërisht golat e pësuar janë një çështje për t’u shqetësuar në radhët e Real Madrid. Los Blancos janë skuadra e tretë e La Ligas me më shumë gola të pësuar në të gjitha kompeticionet këtë sezon. Në 50 ndeshje, Reali e ka nxjerrë topin nga rrjeta plot 56 herë.

Më keq në këtë drejtim kanë bërë vetëm Real Valladolit me 71 gola dhe Girona me 58 gola të pësuar.

Finalja e Kupës së Spanjës, do të luhet në 26 Prill në Sevilla, në Estadio de La Cartuja.