Eric Maxim Choupo-Moting ishte fajtori se përse PSG nuk u shpall kampion që në javën e 31-të në Francë. Kundër Strasburgut 30-vjeçari humbi një nga rastet më flagrante për të shënuar gol. Por si fillim ishte ai që zhbllokoi ndeshjen në minutën e 13-të. Strasburgu në dhjetor i mori një barazim 1-1 kampionëve në fuqi dhe në Parc des Princes ata treguan sërish se dinë të jenë surprizues ndaj skuadrave të mëdha. Da Costa shënoi barazimin në minutën e 26-të. Pas barazimit PSG kërkoi medomos të shënonte dhe rastin mëtë mirë të mundshëm e shpërdëroi Choupo Moting, ku edhe pse kishte portën e zbrazur, bëri të pamundurën duke e ndalur topin në vijë. Kjo humbje goli kaloi me reagime edhe në stolin e PSG. Më vonë pikërisht ky gol i munguar do të rezultonte vendimtar për llogaritë skuadrës së Thomas Tuchel.
Fill pas një goditje nga këndi Strasburgu shënoi përmbysjen bernda pjesës së parë me Goncalves. Në pjesën e dytë Choupo-Moting u zëvendësua nga Mbappe, por edhe hedhja në lojë e golashënuesit të skuadrës nuk dha më shumë se barazimin për PSG barazim që u realizua nga Kehrer. U mbyll 2-2 dhe pas ndeshjes i gjithë shtypi sportiv fliste për 30-vjecarin Choupo-Moting. “E prisja një pasim në zonë, dhe kur topi më erdhi mendova shumë. Pandeha se isha në pozicion jashtë loje dhe thjesht e preka topin, që më pas u ndal në shtyllë, e di, ishte turp i madh sepse ishte gol i sigurt dhe më vjen shumë keq për këtë” tha ish-sulmuesi i Stoke. PSG mbetet në krye me 20 pikë distancë nga Lille i vendit të dytë, fundjava mund t’u sigurojë atyre titullin.
