Real Madrid interesohet për të nënshkruar një marrëveshje me trajnerin Mauricio Pochettino në fund të sezonit. Ndonëse është pjesë e PSG prej më shumë se një viti, në Parc des Princes, tekniku argjentinas gjithmonë ka qenë i rrethuar nga aludime, të cilat e kanë parë atë larg kryeqytetit francez.
Në mënyrë të vazhdueshme, ka qenë Manchester United klubi që ka shfaqur më tepër interes mbi Pochettinon, mirëpo tanimë djajtë e kuq, nuk janë më të vetëm në këtë garë.
Ndonëse këtë edicion po zhvillon një sezon relativisht të mirë në Spanjë, e ardhmja e Carlo Ançelottit në krye të pankinës madrilene, ka filluar të duket e dyshimtë. Përgjatë kohëve të fundit në Santiago Bernabeu, tifozët, por jo vetëm, nuk janë shumë të kënaqur me skemat e teknikut në fjalë, e në këto rrethana, nuk përjashtohet mundësia që presidenti Florentino Perez të marrë vendimin për të ndërprerë bashkëpunimin me takticienin 3 herë fitues të Champions League.
Në fakt, ka një arsye shumë të fortë përse 13 herë kampionët e Europës interesohen për Pochettinon dhe ai është Kylian Mbappe. Tekniku në fjalë, ka një raport të shkëlqyer me kampionin e botës në Parkun e Princave.
Më tej, në merkaton e verës, të gjitha rrethanat thonë që Mbappe do zbarkojë në Santiago Bernabeu, aty ku do të nënshkruajë me Los Blancos. Pikërisht për këtë arsye, bordi drejtues i Realit, ka mbërritur në konkluzionin se Pochettino mund të jetë trajneri ideal për të udhëhequr skuadrën në edicionet e ardhshme, që në qendër të projektit do të jetë pikërisht Kylian Mbappe.
Këto janë raportimet më të fundit që qarkullojnë në mediat ndërkombëtare. Sigurisht që kjo është një temë, mbi të cilën do të diskutohet gjatë në pjesën e mbetur të këtij viti futbollistik, aty ku në vijimësi do të kemi një panoramë më të qartë mbi çështjen në fjalë.
