Kevin De Bruyne nuk do të largohet nga Manchester City. Pavarësisht se çfarë është thënë përgjatë ditëve të fundit, se belgu do të transferoher në Arabinë Saudite, në skuadrën e Al Ittihad, diçka e tillë nuk do të ndodhë. Personazhi që e ka garantuar qëndrimin e De Bruyne me kampionët e Anglisë, është vetë trajneri i Cityt, Pep Guardiola.
“Kevin nuk do të largohet. Nëse dikush do të largohet, atëherë do të flasim dhe do të shqyrtojmë mundësitë tona deri në ditën e fundit të merkatos. Nuk e përjashtoj përforcimin me lojtarë të rinj, por mendoj se 85, 90, apo edhe 95%, do të kemi të njëjtën skuadër edhe në edicionin e ri futbollistik”, është shprehur Pep, tekniku i Cityzens, i cili ka dalë si garanci për qëndrimin e De Bruyne.
Mesfushori ka ende edhe një vit kontratë me blutë nga Manchesteri dhe në rast se nuk do të largohet, atëherë, ekziston mundësi që palët të diskutojnë rinovimin e kontratës, sepse klubi nuk do të rrezikonte që lojtari të largohej me parametra zero në verën e ardhshme.
