Tri ndeshje skualifikim për Gianlugi Buffon. Ky ka qenë vendimi Disiplinor i UEFA-s, që pas hapjes së një hetimi vetëm disa ditë më parë, tashmë e ka ndëshkuar ish-portierin e Juventusit për atë që ndodhi më 11 prill, me rastin e cerekfinales së kthimit të Champions League, Real Madrid-Juventus. Në atë rast, Buffon u ndëshkua me karton të kuq nga gjyqtari francez Oliver, për shkak të protestave që pasuan penalltinë e akorduar në favor të Realit në minutën e 93-të. Penallti që u dërgua në rrjetë nga Cristiano Ronaldo, duke i dhuruar Realit golin që i vlejti kalimin në gjysmëfinale. Buffon ka paguar me një ndeshje kartonin e kuq të marrë në fund të atij takimi në “Bernabeu”, kurse me dy ndeshje të tjera është ndëshkuar për deklaratat e lëshuara në drejtim të gjyqtarit, kur u shpreh se “Një qenie njerëzore nuk mund të vërshëllejë eleminimin e një skuadre, pas një episodi tepër të dyshimtë. Oliver, në vend të zemrës, ka një kazan mbeturinash!”.
Ndërkohë pas këtij dënimi pritet që shpejt të vijë edhe zyrtarizimi për transferimin e portierit 40-vjeçar në Francë tek Paris SG. Aty ku do të vuajë edhe pezullimin, me nisjen e edicionit të ardhshëm të Champions League.Gjithashtu, edhe trajneri i Manchester Cityt, Pep Guardiola është skualifikuar nga Komisioni Disiplinor i UEFA-s me dy ndeshje, një prej të cilave e ka kryer gjatë edicionit të kaluar. Arsyetimi për këtë ndëshkim të spanjollit është sjellja e pahijshme pas ndeshjes së dytë çerekfinale të Champions Leagues kundër Liverpoolit. Ndër të tjera, UEFA ka gjobitur edhe Liverpoolin me 20.000 euro pas incidenteve në sfidën e parë të çerekfinales së Championsit në prill, duke përfshirë një sulm në autobusin e skuadrës së Manchester City, pas mbërritjes në stadiumin “Anfield”.
