Carlo Ancelotti (trajneri i Napolit): “Na pret një sfidë e rëndësishme sot pasi shumë na shohin favoritë. Mbase jemi të tillë, por kjo nuk duhet të na japë luksin për t’i marrë gjërat shtruar. Unë mendoj se sfida do të jetë mjaft e komplikuar dhe pas asaj që ndodhi në ndeshjet e para, Genk do të kërkojë të bëjë më të mirën e mundshme. Megjithatë skuadra ime ka fituar eksperiencën e duhur për të zgjidhur çdo situatë dhe në këtë sfidë kemi për detyrë të fitojmë duke luajtur futboll të bukur. Duam të marrim 3 pikët dhe të vazhdojmë të qetë rrugëtimin tonë në këtë kompeticion. Nga sezoni i shkuar mësuam se edhe takime të tilla mund të jenë deçizive kur bëhen llogaritë në fund, prandaj besoj se lojtarët e mi do të zbresin në fushë për të siguruar fitoren sa më shpejt të jetë e mundur.”
Kalidou Koulibaly (mbrojtës i Napolit): “Presim një ndeshje të luftuar shumë fort, sidomos nga ana fizike. Jemi plotësisht të përqëndruar për të marrë tre pikët dhe nuk kemi ndërmend të nënvlerësojmë kundërshtarin. Është bukur të kthehem këtu. Kam kaluar 2 sezone të mrekullueshme si lojtar i Genk dhe njoh shumë prej atyre që janë pjesë e klubit. Gjithësesi tani do të zbres në fushë si lojtar i Napolit dhe si kundërshtar i tyre. Do të përpiqem të ndihmoj skuadrën për të bërë një tjetër paraqitje të madhe si ajo ndaj Liverpool. Nuk ka për të qenë aq e thjeshtë sa duket, por jemi besimplotë për një rezultat pozitiv.”
