Një tjetër paraqitje për t’u harruar nga delegacioni i sportistëve shqiptar në Minsk, që është kthyer pa asnjë medalje nga Lojërat Europiane, Minsk 2019. Edhe shpresa e fundit, boksieri Krenar Zeneli u mposht nga kundërshtari britanik, Peter McGrail, një sportist mjaft i fortë dhe i suksesshëm. Britaniku ishte ai që kaloi në gjysmëfinalen e kategorisë deri në 56 kilogramë, duke shuar kështu edhe shpresat e fundit të Shqipërisë për t’u renditur në zonën e medalejeve, të paktën në një disiplinë sportive.
Me pak fjalë, Minsku ka rezultuar fatkeq për sportistët kuqezi, të cilët nuk arritën që të merrnin asnjë medalje.
Krejt e kundërta ndodhi me sportistët kosovarë, të cilët patën mundësinë të provojnë shijen e të gjitha medaljeve, që erdhën nga xhudistet Kelmeni, Gjakova dhe Kuka. Në boks për Kosovën garoi edhe 19-vjeçari, Patriot Behrami në kategorinë 69 kg. Aty mundi fillimisht kroatin Marko Zejljo 4–0 dhe më pas medalistin olimpik Vinçenco Manxhiakapre. Mirëpo kur mbërriti në çerekfinale Behrami u mund nga kubanezi me shtetësi azere, Lorenco Sotomajor, një ndër boksierët amatorë më të njohur në botë.
