Teksa ka kaluar thuajse 1/3-ta e merkatos së Janarit, skuadrat e mëdha në Serie A, po përpiqen të bëjnë lëvizjet e tyre, ndonëse deri më tani nuk ka diçka konkrete. Kampionët në fuqi të Interit, duken disi më të qetë në këtë pjesë sa i përket afrimeve, por zikaltërit po përgatiten të rinovojnë kontratën me një futbollist të rëndësishëm të organikës. Fjala është për Stefan De Vrij. Marrëveshja aktuale e mbrojtësit të qendrës, mbyllet në fundin e këtij sezoni, me mundësi rinovimi edhe për një tjetër vit futbollistik.
Megjithatë, siç njoftohet nga mediat matanë detit, shanset janë të mëdha, që De Vrij të rinovojë një kontratë të re, të paktën për dy edicione të tjera. Si klubi dhe lojtari, gëzojnë një marrëdhënie të mirë mes tyre, çka e ka kanalizuar çështjen në rrugë të mbarë. Hollandezi është përpjekur të tregohet besnik ndaj Interit, teksa për të qëndruar me 20 herë kampionët e Serie A, ka refuzuar oferta nga klube të ndryshme.
Më tej, sa i përket Napolit, të kaltërit, fillimisht synojnë të përforcohen në mbrojtje, e më konkretisht në qendër të saj. Prej disa kohësh u diskutua për Milan Skriniar të PSG, por bëhet gjithashtu me dije se jugorët e Italisë kanë hequr dorë nga ish-lojtari i Interit, për shkak se sllovaku ka një pagë të lartë, të paktën 6 milionë euro në sezon dhe një shumë e tillë është konsideruar e papërballueshme nga 3 herë kampionët e Serie A. Në mesfushë, parashikohet dhe është e mundur të vijë në huazim me të drejtë blerje 10 milionë euro, Philip Billing, i skuadrës së Bournemouth
Në të njëjtën kohë, Napoli po mendon edhe për fazën sulmuese, pasi Kvicha Kvaratskehlia mund të largohet, kështu që ka nisur puna për një zëvendësues të gjeorgjanit.
Në merkato është gjithashtu edhe Juventusi. Zonja e Vjetër kërkon përforcime si në sulm, ashtu edhe në mbrojtje. Emra si Kolo Muani, apo Ronald Araujo janë në radarat e klubit torinez. Aktive po përpiqet të tregohet edhe Milani, që në objektiv ka një emër të dëgjuar dhe me peshë, sikurse është Marcus Rashford, mirëpo ngërçi i momentit është paga e lartë e futbollistit anglez.
