Mbrojtësi i Kombëtares së Shqipërisë, Elseid Hysaj, edhe në këtë edicion ka treguar formë të lartë te skuadra e Napolit nē Serie A. Futbollisti i cili aktivizohet si mbrojtës i djathtë, ka zgjuar interesimin e shumë skuadrave të mëdha evropiane. Klubet nga Premierliga angleze Manchester United dhe Chelsea janë në garë për t’i siguruar shërbimet e tij. Kjo të paktën është ajo që ka raportuar gazeta e përditshme angleze Daily Mail. Sipas saj, klubet në fjalë janë të gatshme të pauajnë 44 milionë euro për shërbimet e lojtarit nga Shkodra. Për më tepër, nga kanali Sportitalia, është zbuluar se agjenti i mbrojtësit të Shqipërisë, Mario Giuffredi, është takuar disa herë me Chelsean, skuadër e cila e konsideron 24-vjeçarin si të përkryer për Premierligë.
Megjithatë, klubi londinez do të përballet me konkurrencë nga Unitedin, që është shumë i interesuar për Hysajn, me të cilin dëshiron ta zëvendësojë Matteo Darmianin që duket drejt largimit. Ndërkohë, në mesin e të interesuarave është edhe Liverpooli.
Anësori është duke pasur paraqitje të shkëlqyeshme me Napolin dhe kjo ka bërë që ai të kërkohet nga skuadra të mëdha evropiane. Gjithashtu ka qenë në radarin edhe të skuadrave tjera europiane, përfshi Barcelonën në Spanjë, apo edhe kampionin e Gjermanisë, Bayern Munich.
Hysaj me Napolin ka kontratë deri në vitin 2021, ndërsa vlera e klauzolës së largimit të tij është rreth 50 milionë euro.
