Jurgen Klopp duket alternativa më e mirë për Liverpool-in për të zëvendësuar Brendan Rodgersin e shkarkuar të djelën. Sipas shtypit britanik “Reds”-at shpresojnë që të nënshkruajë me ish-trajnerin e Borussias së Dortmundit në fund të javës.
48-vjecari Klopp përshkruhet si alternativa më e mirë për të zëvendësuar irlandezo-veriorin Rodgers, ndërkohë që edhe Carlo Ancelotti thuhet të jetë gjithashtu një kandidat serioz. Por Liverpool duket më e përqendruar te gjermani, i cili thuhet të jetë i hapur për të marrë drejtimin e skuadrës angleze.
Sipas BBC, bisedimet po shkojnë mirë dhe të kuqtë duan të kenë një trajner të ri përpara ndeshjes me Tottenhamin më 17 tetor. Gjermanit thuhet se do t’i ofrohet një kontratë tre-vjecare. Ndërkohë Klopp raportohet të ketë marrë informacione për Liverpool-in si klub dhe si qytet, nga ish-mesfushori Dietmar Hamann. Ai ka qenë i pa-punë që pasi u largua nga Borussia e Dortmundit, klub me të cilin ai fitoi dy herë titullin e Bundesligës.
