Lazio arrin të fitojë në javën e 21 të Serie A. Pasi kishin 3 ndeshje njëra pas tjetrës që nuk merrnin dot maksimumin e pikëve në kampionat, kryeqytetasit e kanë bërë diçka të tillë në transfertën e Veronës, atje ku triumfuan 3-1. Gigot, Dia dhe Zacagni ishin autorët e golave për ekipin e drejtuar nga Baroni. Lazio, është skuadra e vetme këtë sezon në Serie A, që ka të paktën 3 lojtarë me nga 6 gola të shënuar. Ata janë, Castellanos, Dia dhe Zacagni. Ky është një tregues, se të kaltërit, kanë shumëllojshmëri shënuesish në ekip dhe nuk janë të varur nga një lojtar i vetëm. Duhet thënë se këtë edicion, Lazio e nisi në mënyrën më të mirë të mundshme, ndërsa tronditja erdhi pas humbes së thellë 6-1 ndaj Interit në shtëpi. Pastaj, disfata me Romën në derbi, e më tej, barazimet me Atalantën dhe Comon. Megjithatë, pavarësisht ulje-ngritjeve përgjavë javëve të fundit, sezoni i Lazios duket në rrugë mëse të mbarë. Për momentin, të kaltërit janë në vendin e 4 të tabelës së renditjes, në kuotën e 39 pikëve, duke lënë pas vetes skuadra se Juventusi, Fiorentina, Bologna, apo edhe Milani. Në javën e ardhshme, Lazio do të luajë ndaj Fiorentinës në shtëpi.
