Situata e Antoine Griezmann në ditët e fundit ka qenë disi e paqartë. Pasi konfirmoi largimin e tij nga Atletico Madrid, u duk se kampioni i botës do të nënshkruante me Barcelonën, mirëpo gjërat nuk është se kanë ecur me ritmin e duhur. Lajmet nga Katalonja raportonin se Griezmann nuk dëshirohej nga të gjithë në kampin blaugrana, ndërsa të tjera spekulime thonin se lojtari kishte firmosur prej kohësh me kampionët e Spanjës. Së fundmi, drejtori i Alteticos, Miguel Angel Gil Marin, ka konfirmuar se Antoine Griezmann do të jetë pjesë e Barcelonës në sezonin e ardhshëm.
Megjithatë kjo nuk ka ndalur një tentativë të fundit të Manchester United për të nënshkruar me sulmuesin 28-vjeçar. E përditshmja britanike, ‘The Sun’, citon fjalët e Griezmann pas fitores 4-0 të Francës në transfertën me Andorrën, se ka mundësi që ai sezonin e ardhshëm të mos luajë në ‘La Liga’-n spanjolle. Manchester United është duke bërë një përpjekje të fundit për Griezmann dhe thuhet se ‘djajtë e kuq’ kanë ofruar për Atleticon një shifër prej 105 milionë eurosh. Kjo ofertë i tejkalon shifrat e klauzolës së Griezmann, por duket se vendimtare në këtë situatë do të jetë dëshira e vetë lojtarit.
