Dëmtimet vazhdojnë të gjunjëzojnë Juventusin. Lojtari i radhës që i është bashkuar infermierisë, është mbrojtësi Federico Gatti. Në ndeshjen që bardhezinjtë luajtën në shtëpi ndaj Genoas, dhe që e fituan 1-0, italiani pësoi një lëndim në këmbën e majtë. Testet e kryera përgjatë ditës së Hënë, kanë nxjerrë një përfundim aspak të mirë. Dëmtimi është serioz, çka do të thotë se lojtari pritet të qëndrojë jashtë fushave të lojës për periudhë një mujore.
Kjo është hera e parë përgjatë këtij edicioni futbollistik që Gatti dëtmohet dhe që do të mungojë për Juventusin. 26 vjeçari është kthyer në një prej lojtarëve më të rëndësishëm të organikës bardhezi. Deri në këtë fazë të sezonit, shtatlarti i prapavijës ka luajtur 40 ndeshje në të gjitha kompeticionet, teksa pritet të rikthehet në dispozicon të trajnerit Igor Tudor, vetëm në javët e fundit të këtij edicioni.
Objektivi i vetëm i Juventusit këtë edicion është klasifikimi në vendin e katërt të Serie A, që të garanton pjesëmarrjen në Champions League. Me shumë mundësi, siç bëjnë të ditur mediat e huaja, Gatti mund të mungojë 5 ndeshjet e ardhshme të ekipit bardhezi, ndërsa parashikohet të kthehet 3 javë nga fundi.
