Manchester United vazhdon të zhgënjëjë, si në kampionatin anglez, ashtu edhe në Evropë. Përballë Valencias, ndonëse luanin në ‘Old Trafford’, ‘djajtë e kuq’ nuk shkuan më shumë se një barazim pa gola. Një konferencë të shkurtër për shtyp, trajneri Jose Mourinho përpiqet të analizoë situatën dhe pranon se skuadra e tij nuk po kalon një moment të mirë. “Është e rëndësishme të marrim sa më shumë pikë të mundemi. Nuk kemi një formë të mirë, por është ende fillimi i sezoni, ndaj nuk mendoj se këto rezultate tani, pasqyrojnë ate çfarë mund të ndodhë në muajt e tjerë. Kemi mundësinë të bëjmë shumë më mirë dhe duhet të përmirësohemi që t’i mbyllim ndeshjet sa më shpejtë të jetë mundur.”
Trajneri portugez pranoi se sfida e ardhshme në Premier League ndaj Newcastle duhet fituar detyrimisht nga ana e lojtarëve të tij. Ndonëse skuadra kundërshtare nuk ka bërë një start të mirë të sezonit, Mourinho shprehet se fitorja mbetet e vështirë, pasi vlerëson së tepërmi trajnerin e Newcastle, Rafael Benitez. Sa i përket pozicionit të Mourinhos në krye të stolit të United, në Angli përflitet se një grup lojtarësh kërkojnë largimin e portugezit, ndaj edhe nuk japin më të mirën e tyre sa herë që janë në fushë.
