Luciano Spalletti kishte të drejtë, arsyeja se përse Interi ka rreshtuar pothujse gjithmonë të njëjtët lojtarë në 16 javë të Serie-A-së ka qenë se në stolin e rezervave nuk ka shumë alternativa të denja. Në sfidën e Kupës së Italisë kundër një rivali si Pordenone, nga kategoria e tretë, zikaltërit u kualifikuan vetëm pas penalltive. Karamoh, Dalbert, Cancelo dhe Pinamonti ishin ata që zhgënjyen në testin më të rëndësishëm që u dha trajneri i tyre, rezultati. Përgjigjia e të rinjve ishte zhgënjyese për zikaltërit, ndërsa edhe aktivizimi i Brozovic, Perisic dhe Icardit nuk e zgjidhi dot ndeshjen, që shkoi në shtesë e më pas drejt penalltive. Gabimet e Skriniar dhe Gagliardinit, u bënë të harroheshin nga shpërdorimi i Parodit për Pordenonen që humbi kështu dhe takimin. Pas ndeshjes trajneri i Interit u tregua i drejtpërdrejtë ndërsa tha se nëse skuadra e kategorisë C do të kishte fituar, do të kishte qenë me meritë, kjo pasi luajtën më mirë. “Ishim nën nivelin tonë, mbase paralajmërimet e mia nuk kanë gjetur vëmendjen e duhur” – tha trajneri i Interit pas ndeshjes. Në ambientin e tyre kërkohet vëmendje maksimale, sidomos pas marrjes së kryesimit me 40 pikë të kampionatit. Barazimi me Juventusin tregoi se ky Inter është krejt tjetër, por barazimi me Pordenonen tregoi dobësinë e parë të kësaj skuadre, pikërisht stoli i rezervave, stol që shpresohet të pasurohet me lojtarë më të dobishëm në merkaton e janarit.
