Një nga dëshirat kryesore të kësaj vere për trajnerin Pep Guardiola është realizuar. Ashtu siç kishte kërkuar tekniku katalanas, Manchester City ka rinovuar kontratën me mesfushorin Ilkay Gundogan, i cili do të vijojë të jetë pjesë e kampionëve të Anglisë edhe për 4 vite të tjera. 28-vjeçari firmosi mbi kontratën që do ta mbajë të lidhur me ‘citizens’ deri në vitin 2023.
Vetë lojtari e kishte shprehur prej kohësh dëshirën për të vijuar karrierën në Manchester, teksa pas zyrtarizimit të marrëveshjes së re, pranoi se kjo do të jetë kontrata e tij e fundit afatgjatë në karrierë. Gundogan zbuloi se një nga arsyet kryesore që e bënë të rinovonte pa u menduar ishte edhe këmbëngulja e Pep Guardiolas. Mesfushori thotë se i pëlqen shumë të luajë nën urdhërat e trajnerit katalanas, nga i cili thotë se vazhdon të mësojë çdo ditë e më shumë.
Dëshira e madhe e klubit është të arrijnë tek trofeu i ‘Champions League’ dhe Gundogan beson se Manchester City-t i ka të gjitha mundësitë për ta arritur diçka të tillë. Për 28-vjeçarin kishin shfaqur interes disa skuadra të mëdha në kontinent, por vetë Gundogan kishte kërkuar rinovimin me ‘citizens’.
I pyetur rreth objektivave të së ardhmes, ai tha se klubi anglez kërkon të fitojë në çdo kompeticion që luan, por shtoi se për momentin, vëmendja e të gjithë skuadrës është tek fillimi i sezonit të ri të ‘Premier League’. Mesfushori u shpreh se pret që këtë vit, gjërat për Manchester City-n të jenë më të komplikuara se më parë, pasi veç Liverpoolit që mbetet rival kryesor, edhe skuadra si Tottenham apo Arsenal janë përforcuar ndjeshëm në merkato.
