Pep Guardiola është një nga mbështetësit më të mëdhenj të talentit anglez Phil Foden, i cili ka tërhequr gjithmonë vëmendjene tij me paraqitjen me Manchester City. Mesfushori i ri është një nga të preferuarit e trajnerit katalanas dhe ndonëse jo gjithmonë ka minuta prej titullari, Foden po kthehet dalëngadalë në një element kyç tek ‘citizens’. Por për një talent që premton shumë, qëndrimi në stol nuk është diçka që mund të pranohet lehtë. Foden kërkon të jetë pjesë e kombëtares së parë të Anglisë dhe një rol protagonisti në skuadrën ku luan, prandaj shumë media në ishull kanë spekuluar për një largim të mundshëm të tij nga Manchester City. Por nuk ka vonuar një përgjigje e klubit për këto raportime. Madje është vetë Pep Guardiola që kërkon t’i japë fund çdo skenari të mundshëm, duke deklaruar se Phil Foden nuk do të largohet nga Manchester City.
“Ai është lojtari i vetëm që nuk do të shitet në asnjë lloj situate. Foden nuk do të shitet as për 500 milionë euro. Ai i përket City-t dhe nuk do të ketë asnjë largim apo blerje të re për pozicionin e tij.”
Guardiola deklaroi se në momentin që David Silva do të largohet, diçka që spanjolli e ka lajmëruar për në fundin e sezonit aktual, tek Manchester City e dinë të gjithë se kush do të jetë pasuesi i tij. Guardiola e cilësoi Foden si magjistari i ri që do të udhëheqë ‘citizens’ dhe fakti që të dy palët e kuptojnë mirë njëri-tjetrin, kanë bërë që zgjedhjet e trajnerit të mirëkuptohen nga ana e talentit anglez.
