Granit Xhaka mund të rinovojë kontratën me Arsenalin. 30 vjeçari është kthyer në një nga lojtarët më të rëndësishëm të Gunners, sidomos këtë edicion futbollistik, ku me kontributin e tij, po e ndihmon ekipin të jetë në garë për titullin kampion, që në Emirates mungon thuajse prej dy dekadash.
Performancat e Xhakës me Arsenalin kanë ardhur gjithmonë në rritje, sidomos pas Tetorit të 2019-tës, atëherë kur pati edhe një përplasje me tifozët e kubit, për shkak të heqjes së shiritit të kapitenit në sfidën ndaj Crystal Palace.
Megjithatë, që prej atij momenti, situata ka ndryshuar dhe një rol kyç në këtë mes e ka luajtur trajneri Mikel Arteta, i cili e bindi lojtarin që mos largohej nga 13 herë kampionët e Anglisë. E në fakt kështu ndodhi. Xhaka qëndroi, teksa me paraqitjet e tij pozitive, ka fituar edhe një herë tjetër dashurinë e tifozëve, ndërsa është gjithashtu edhe kapiteni i dytë i skuadrës, pas Martin Odegaard.
Në rrethana të tilla, sikurse raportojnë mediat ndërkombëtare, drejtuesit e Arsenalit pritet t’i ofrojnë Xhakës një rinovim të kontratës, me atë aktualen që përfundon në verën e 2024-tës, por që ka mundësi të rinovohet edhe për një vit më tepër.
Megjithatë, kjo është pjesë e marrëveshjes së vjetër, sepse në të renë, pritet të ketë të tjera kushte.
Xhaka është bashkuar me Arsenalin që prej korrikut të 2016-tës, e prej atëherë ka luajtur më tepër se 300 ndeshje me Arsenalin në të gjitha kompeticionet.
