Humbja me Meksikën vazhdon t’u djegë gjermanëve, por Muller dhe Bierhoff kanë rendur të përgënjeshtrojnë lajmet se kampionët e Botës nuk kanë harmoni në grup. Kjo çështje gjeti vend në mediat gjermane fillë pas humbjes 1-0 me Meksikën dhe u risoll në vëmendje nga gazetarët gjatë konferencës për shtyp të së mërkurës, por Thomas Muller përgënjeshtroi gjithçka. “A e keni këtë gjë të konfirmuar?! Keni burime?! S’e besoj!” – tha Muller përballë pyetjes nëse janë krijuar fraksione brenda grupit të skuadrës, kjo duke pasur parasysh edhe mënyrën se si u përzgjodh skuadra ku Sane u la jashtë.
“Në 2012-ën ne s’kishim aspak lidhje me njëri-tjetrin, dhe ky s’është aspak rast i ngjashëm. Për sa i përket Meksikës, mendoj se i morëm gjërat shumë lehtë pas nxehmjes. Por pas rezultatit, të gjithë kemi bërë autokritikë” tregoi sulmuesi i Bayernit. Më tej Bierhoff, përgjegjësi i skuadrës, njëherësh një emër i madh i futbollit gjerman, tha se kjo çështje është zmadhuar më shumë nga ç’mund të kishte ndodhur në të kaluarën. Ish-lojtari i përfaqësueses tha më tej se tanimë kampionët në fuqi janë të përqendruar për takimin e radhës. “Sigurisht, tensioni është këtu, por të gjithë jemi të vetëdijshëm që finalja jonë e parë është kundër Suedisë” – tha Bierhoff. Pas humbjes me Meksikën, Gjermanisë i duhet me patjetër të mundë Suedinë, e cila ka tre pikë pasi fitoi ndaj Koresë së Jugut.
