Diego Simeone (Trajneri i Atletico Madrid)
Bëmë një performancë të madhe në ndeshjen e parë. Kësaj radhe do të përpiqemi të luajmë edhe më mirë. Luajnë dy skuadra të forta, të cilat janë të gatshme të japin maksimumin për të kaluar më tej. Duhet të shfrytëzojmë hapësirat që do të na krijohen gjatë lojës dhe ta godasim kundërshtarin në momentet më delikate. Kam besim tek skuadra ime dhe tek të gjithë lotjarët që kam në dispozicion. Djemtë do të japin më të mirën e tyre, pa menduar për rezultatin e ndeshjes së parë. Juventusi është një skuadër e fortë, që ka lojtarë me mjaft eksperiencë dhe që nuk janë të zotë vetëm në sulm. Qetësia dhe përulësia janë themelet që do të na japin një tjetër triumf ndaj tyre. Jemi të përgatitur si duhet dhe nuk ndjejmë presion pasi jemi mësuar me të tilla nivele. Nuk vijmë këtu për t’u mbrojtur, por për të luajtur një ndeshje të madhe e për të fituar.
Koke (Mesfushor i Atletico Madrid)
Në Champions League mund të ndodhë çdo gjë dhe nuk duhet të humbim përqëndrimin nga ndeshja jonë në asnjë moment. Duhet të jemi të përgatitur për një ndeshje tjetër të madhe. E dimë se janë edhe 90 minuta të tjera, prandaj çdo gjë mbetet në diskutim. Do të luajmë një ndeshje mjaft intensive dhe që mund të vendoset nga episodet. Këtë duhet ta shmangim, pasi nuk mund t’i lejojmë vetes të bëjmë të njëjtat gabime si në të shkuarën. Është e qartë që ata do të hidhen mënjherë në sulm, por kemi luajtur edhë më parë ndeshje të tilla, në stadiume si ky. Ata do të kenë një mbështetje të zjarrtë sot, por në fushë jemi 11 me 11, prandaj e dimë se do të kemi shanset tona, të cilat duhet t’i shfrytëzojmë si duhet.
