Finalja e Kupës së Spanjës do të jetë një El Clasico mes Real Madrid dhe Barcelonës. Pasi të Martën, Los Blancos, eliminuan Sociedadin, të Mërkurën, blaugranat eliminuan Atleticon e Madridit. Në Estadio Metropolitano, katalanasit fituan me rezultatin minimal 1-0, falë golit të Ferran Torres, teksa rezultati i përgjithshëm u mbyll 4-4. Kështu, në finalen e 26 Prillit, në Estadio de La Cartuja të Sevillas, Reali dhe Barcelona do të sfidojnë njëra-tjetrën në një tjetër finale të Kupës së Mbretit. Përballja e fundit e dy rivalëve të përjetshëm në një finale të Kupës, i përket vitit 2014-të dhe atëherë në Mestalla të Valencias, ishte Reali që doli triumfues. Sa i përket historikut në finalet e Kupës, Reali dhe Barcelona janë ndeshur 7 herë mes tyre. 4 herë kanë fituar madrilenët, kurse 3 herë katalanasit. Po ashtu, Real-Barcelona, është finalja e dytë më e luajtur në historinë e Kupës së Spanjës. Finalja më e përsëritur është ajo mes Barcelonës dhe Bilbaos, plot 9 herë. Nuk mbyllet me kaq. Vetëm dy javë pas finales së Kupës, Reali dhe Barcelona do të ndeshen sërish në 11 Maj, në atë që është dueli i kthimit për La Ligas. Po ashtu, rivalët e përjetshëm, mund të sfidohen gjithashtu edhe në finalen e UEFA Champions League, nëse të dyja e vazhdojnë rrugëtimin deri në fund.
