E ardhmja e Viktor Gyokeres mund të jetë në Premier League. sulmuesi suedez po përjeton një sezon të jashtëzakonshëm në aspketin personal me Sportingun e Lisbonës. Në 27 javë, ai ka mundur të shënojë 30 gola vetëm në kampionat, ndërsa në total, janë 42 gola në po kaq ndeshje të luajtura. Thënë ndryshe, Gyokeres, po përjeton edicionin më të mirë të karrierës dhe numra të tillë, kanë tërhequr vëmendjen e klubeve me peshë të Europës, kryesisht në Angli. Siç njoftojnë mediat e huaja, Manchster United dhe Arsenal duan të firmosin me 26 vjeçarin përgjatë merkatos së kësaj vere.
Tek United, sulmuesi shtatlart ka mundësi të bashkohet me ish-trajnerin e tij, Ruben Amorim, me të cilin nisi të shkëlqente në Jose Alvalade. Megjithatë, fakti që djajtë e kuq kanë treguar luhatje të vazhdueshme sezonale dhe mungesë rezultatesh, mund të jetë një arsye, që suedezi të pranojë ofertën e Arsenalit. Prej disa sezonesh, Gunners janë ndër pretendentët kryesorë për të fituar kampionatin, ndonëse deri më tani nuk ia kanë dalë dot mbanë.
E pikërisht projekti premtues i trajnerit Mikel Arteta, mund ta bëjë lojtarin të transferohet ne Emiratës. Një sulmues qendre është pikërisht lojtari që Arsenalit i është dashur, sidomos përgjatë këtij viti futbollistik, me dëmtimet e Kai Havertz, apo të Gabriel Jesus. Vera nuk është shumë larg, kështu që në të ardhmen e afërt, pritet të mësojmë më tepër detaje mbi të ardhmen e futbollistit në fjalë.
Me Sportingun, Gyokeres ka një kontratë deri në 2028-tën, kurse vlera e tij në merkato cilësohet 80 milionë euro. Megjithatë, sikurse raportohet, kampionët në fuqi të Portugalisë, mund ta lejojnë largimin e lojtarit edhe për një ofertë prej 75 milionë eurosh. Nëse ndodh kështu, atëherë, në çdo rast, Sportingu do të dilte shumë i fituar, sepse në verën e 2023-shit, e bleu lojtarin për 25 milionë euro.
