Paris SG ka gjetur marrëveshjen me Manchester Junaited për kalimin në Francë të Angel Di Marias. Sipas asaj që raporton “France Football”, gjigantët anglezë kanë pranuar ofertën prej 65 milionë eurosh që kanë paraqitur kampionët e Francës.
Argjentinasi mund të bashkohet me skuadrën e tij të re që gjatë kësaj fundjave në SHBA, aty ku francezët po zhvillojnë një tur miqësoresh. Ai do të firmosë një kontratë 5 vjeçare nga e cila do të përfitojë 190 mijë euro në javë.
Shkak për lëvizjen e re të ish-lojtarit të Real Madridit mësohet se është bërë mungesa e rehatisë së familjes së Di Marias në një qytet si Manchesteri, duke preferuar një qytet më tërheqës e të qetë si Parisi.
Di Maria u bashkua me Manchester Junaited gjatë verës së kaluar, teksa u transferua nga Real Madridi për gati 84 milionë euro, një shumë rekord në Premier League. Por duket se aventura e tij nuk ka zgjatur më shumë se një sezon, duke parë edhe se në “Old Trafford” ishte i paqendrueshëm në paraqitjet e tij.
Në 32 ndeshje të luajtura në kampionatin anglez dhe FA Cup, 27 vjeçari realizoi 4 gola, ndërkohë që dha 12 asiste. Rendiment larg pritshmërive të trajneri Van Gaal, i cili në vend të tij ka preferuar të marrë Memfis Depay nga PSV.
