Pas pesë ndeshjesh me rezultate negative, java që lam pas dhe sidomos fundjava mbi të gjitha, ka risjellë optimizmin në Trigoria. Verdhekuqtë e Eusebio Di Francescos mundën si fillim Frosinonen 4-0 e më pas Lazion në derbi 3-1. Për Di Francescon është një rikthim në normalitet, por tashmë presioni është i dyfishtë pasi duhet të rikuperohet gjithcka që u humb me periudhën e krizës. Kundër Lazios u pa një Kolarov i jashtëzakonshëm. Me golin e shënuar hyri në histori si lojtari i dytë pas Arne Selmosson që shënon në derbi me të dyja skuadrat. Po kështu në formë u pa edhe Pellegrini ndërsa problemi në mbrojtje mbetet sërish përqendrimi. Trajneri i verdhekuqve rigjen së paku optimizmin.
Në Champions League është e gjitha vëmendja te përballja me Viktoria Plzenin. Humbja me Realin e Madridit 3-0 në sfidën e parë e bën të detyrueshëm rezultatin. Vetëm fitorja do ta rikthente Romën në lojë për kualifikim në Grupin G, kjo pasi cekët e Plzen kanë ndarë 1 pikë me CSKA-në. Grupi i skuadrës duket më i plotë, por Pastore është ai që shqetëson disi. Problemet fizike dhe sidomos ato muskulore po e shoqërojnë sërish. Ndërkohë mes El Shaarawy-it dhe Edin Dzekos gjërat u përkeqësuan në fushë. I pari nuk i pasoi një top në një rast kundër Lazios, dhe boshnjaku iu hakërrye hapur duke treguar qartë se arsyeja se pse El Shaarawy nuk shihet shpesh si titullar është pikërisht mungesa e koordinimit me Dzekon. Di Francesco është munduar ta kalojë këtë situatë, por ndeshja në Champions League do jetë treguesi i radhës.
