Barcelona kualifikohet në gjysmëfinale të Kupës së Mbretit. Për të siguruar biletën drejt fazës tjetër të kompeticionit, katalanasit u mjaftuan me një fitore minimale 1-0 ndaj Real Sociedad në “Camp Nou”.
Golin e vetëm të sfidës e shënoi Ousmane Dembele në minutën e 52. Është pikërisht anësori i sulmit ai që arriti të tregohej vendimtar përpara publikur katalanas. Duke nisur që nga fillimi i vitit 2022, Dembele është lojtari i dytë me më tepër gola dhe assist në La Liga. Gjatë kësaj kohe, francezi ka kompletuar 10 finalizime dhe 14 pasime për gol. Në vend të parë renditet Vinicius Junior i Real Madrid, me 21 gola dhe 14 asist.
Për t’u rikthyer tek ndeshja, duhet theksuar se që prej minutës së 40-të, për katalanasit, situatë u bë më e lehtë, për shkak të kartonit të kuq të marrë nga lojtari i Sociedad, Brais Mendez. Megjithëse mbeti me një lojtar më pak, skuadra baske nuk preferoi të doërzohej, por arriti të krijonte disa mundësi shënimi, ndonëse në fund nuk pati sukses.
Në kushte si këto, Barcelona vijon më tej rrugëtimin në Kupë, në pritje të kundërshtarit të radhës. Skuadra e tjetër e kualifikuar në gjysmëfinale të turneut është edhe Osasuna, që në mënyrë surprizë mposhti Sevillan me rezultatin 2-1, ndeshje që u vendos në kohën shtesë.
