Dani Olmo dhe Pau Victor do të jenë në gjendje të luajnë për Barcelonën, të paktën përkohësisht. Pas refuzimit që Federata Spanjolle e Futbollit dhe La Liga i bënë klubit katalanas për regjistrimin e dy lojtarëve në fjalë, Barcelona e ka marrë dritën jeshile nga Këshilli Kombëtar i Sporteve, me këtë të fundit, që i ka dhënë mundësi drejtuesve të shoqërisë blaugrana, që të vijojnë punën për regjistrimin me kohë të plotë të dy futbollistëve në fjalë.
Me fjalë të tjera, të dy lojtarët e sipërpërmendur, do të jenë në dispozicion të trajnerit Hansi Flick për finalen e Superkupës së Spanjës ndaj Real Madrid ose Mallorcas, dhe do vazhdojë të jetë kështu, deri në momentin, kur Këshilli Kombëtar i Sporteve në Spanjë, të marrë një vendim përfundimtar në lidhje me këtë çështje.
Ndërkohë, Barcelona është duke punuar me ritëm të lartë, për të gjetur një zgjidhje sa i përket ngërçit financiar që ka kapluar klubin dhe që po e dëmton në shumë drejtime, por sidomos në merkato, dhe më konkretisht në regjistrimin e lojtarëve. Siç raportohet nga mediat spanjolle dhe jo vetëm, 27 herë kampionët e La Ligas, po punojnë për të shitur stolat VIP të stadiumit të ri që është në ndërtim, për shifrën e 100 milionë eurove, në mënyrë që të jetë brenda rregullave të skemës financiare të vendosur nga La Liga.
