Më 20 shkurt, Chelsea pret Barcelonën në Stamford Bridge, në një duel tejet të rëndësishëm që vlen 1/8-at e UEFA Champions League-ës. Por situata është zhgënjyese te anglezët. Blutë vuajtën të hënën një tjetër humbje turpëruese çka e ka vënë në pikëpyetje të ardhmen e trajnerit Conte. Pas humbjes 3-0 me Bournemouth në shtëpi, Chelsea u mund 4-1 nga Watfordi. Fillimisht pati mjaft kontestime, sidomos pas daljes me të kuq të Bakayokos dhe penalltisë së Denney në pjesën e parë. Për 45 minuta Chelsea nuk goditi asnjëherë portën e kundërshtarëve. Në pjesën e dytë pas 2-3 rasteve, ishte Hazard që dha idenë se blutë mund të merrnin një barazim. Por gjithcka nuk zgjati as 5 minuta. Chelsea u shkërmoq nga 3 gola që mbajtën firmat e Janmaat, Deulofeu dhe Pereyra. Pas kësaj humbjeje blutë vënë në diskutim vendin e 4-ët në renditje, pasi kanë vetëm 1 pikë më shumë se Tottenham. Conte është dukshëm nën presion. Ai është shprehur se nëse puna e tij nuk është e mjaftueshme atëherë klubi duhet të marrë një vendim. Ndërsa te Chelsea diskutohet largimi ose jo i Contes, te Barcelona lajmi kryesor ka emrin Pique. Mbrojtësi i cili realizoi golin e barazimit ndaj Espanyolit, është lënduar dhe mund të qëndrojë jashtë fushe për rreth një muaj, çka do të thotë se ai mund të mungojë në përballjet me Chelsea-in në Champions League.
