Spektakël pritej, spektakël ndodhi. Akti i parë gjysmëfinal mes Manchester Cityt dhe Real Madrid dhuroi një mbrëmje të paharruar në Champions League.
Cityzens fituan me rezultatin 4-3, duke lënë gjithçka të hapur për ndeshjen e kthimit në Santiago Bernabeu.
Kur kishin kaluar vetëm 93 sekonda nga fillimi i sfidës, Kevin De Bruyne realizoi golin më të shpejtë në Champions League për Manchester Cityn. Në të 11-tën, rezultati do dyfishohej nga Gabriel Jesus. Nuk kishte ndodhur asnjëherë në historinë e Champions League që Reali të pësonte 2 gola në 11 minutat e para të ndeshjes. Megjithatë, Los Blancos e ngushtuan diferencën me anë të Karim Benzema në minutën e 33.
Në pjesën e dytë, vendasit u rikthyen në fushë me një marsh më të lartë dhe pas disa tentativave, arritën ta gjenin golin e 3-të në minutën e 53. Këtë herë, ishte Phil Foden ai që e dërgoi topin në fundin e rrjetës. Me 9 finalizime deri më tani në Champions League, asnjë lojtar tjetër anglez në moshën 21 vjeç, apo më pak, nuk ka mundur të shënojë kaq shumë. Në të njëjtën kuotë është ndalur edhe Wayne Rooney.
Vetëm 2 minuta pas golit të Foden, Reali gjeti të dytin me anë të Vinicius Junior, i cili e mori topin që nga mesi i fushës, për të dërguar më pas në fundin e rrjetës. Spektakli do vazhdonte edhe më tej. Në të 74-tën, me një të majtë të furishme, Bernardo Silva shkundi rrjetën, duke lënë të palëvizur portierin Thibaut Courtois. 4-2 dhe për të 3-tën herë këtë mbrëmje, City merr avantazhin e dyfishtë, që sërish nuk mundi ta ruante dot. Diferencën e ngushtoi përsëri Karim Benzema, këtë radhë me një panenka nga pika e bardhë e penalltisë.
Për herë të parë gjatë historisë së tij me Real Madrid, Benzema arrin të shënojë të paktën 40 gola brenda një sezoni. Sulmuesi i qendrës bëhet lojtari i 5-të në historinë e Real Madrid që e arrin këtë kuotë finalizimesh, pas Cristiano Ronaldos, Ferenc Puskas, Alfredo Di Stefano dhe Hugo Sanchez. Të mërkurën e ardhshme, Manchester City do zbarkojë në Santiago Bernabeu me avantazhin e një goli, aty ku, minimalisht do përjetojmë një tjetër 90 spektakolar.
