Një skuadër që ka shënuar në Old Trafford dhe që kërkon të shënojë edhe në Fussball Arena. Një skuadër që ka humbur 1-2 në shtëpi dhe që sot s’ka asgjë për të humbur në transfertë, kjo është Sevilla, e cila synon edhe sot të luajë si e barabartë me gjigandët e Evropës. Heynckes e ka paralajmëruar këtë gjë dhe ka kërkuar angazhim maksimal nga të tijët, kjo pasi ishte pikërisht nga një transfertë, si ajo kundër United-it, ku andaluzët surprizuan duke u kualifikuar pas 60 vitesh në të tilla nivele. Shtypi spanjoll e ka cilësuar diçka të mundshme. “Repitelo” ishte titulli i Marcas që inkurajonte andaluzët të bëjnë një tjetër mbrëmje të magjishme sot. Më i rrëzikshëm është po ai, Ben Yedder. Autor i 8 golave këtë edicion.
Përballë do ketë Lewandowskin, por dhe tifozët bavarezë. Këtë sezon, kampionët e rishpallur të Gjermanisë kanë qenë të pamposhtur në shtëpi. 18 fitore dhe 2 barazime në 20 ndeshje janë qetësia që imponon kura Heynckes. Gjithashtu Bayerni është skuadra e tretë, pas City-it dhe Barçës që i dominon ndeshjet me një mesatare mbi 57 përqind të zotërimit të topit. Por e marta tregoi se ky aspekt në futboll nuk mjafton më për t’i siguruar rezultatet, sidoqoftë luhet në Munich dhe e sigurt është se do jetë një mbrëmje e magjishme futbolli.
