Pasi po shijon kualifikimin në çerekfinale të Champions League, Atletico Madrid tanimë ka filluar të mendojë për një çështje tepër serioze në organikën e vetë. Duke u bazuar këtu në raportimin e mediave ndërkombëtare, portieri aktual i Rojiblancos, Jan Oblak mund të largohet në fund të sezonit, e më konkretisht në Premier League tek Newcastle United.
Në këtë mënyrë, drejtuesit e klubit spanjoll nuk duan të gjenden të papërgatitur nga kjo situatë dhe janë vënë menjëherë në lëvizje. Objektivi kryesor është piketuar dhe ai quhet Odysseas Vlachodimos, i cili që prej verës së 2018-tës mbron portën e Benficas.
27 vjeçari ka tërhequr vëmendjen e disa klubeve të tjera me peshë të kontinentit, ndërsa vetë shtatlarti është shprehur se patjetër që do preferonte shumë të luante në një prej 5 kampionateve më të fortë të Europës.
Sa i përket Atleticos, Rojiblancos ende nuk i kanë bërë asnjë ofertë konkrete Benficas për gardianin në fjalë, mirëpo mediat ndërkombëtare shprehen me shumë siguri se Diego Simeone e sheh grekun pasuesin ideal të Jan Oblak. Odysseas Vlachodimos është një produkt i futbollit gjerman, teksa është aktivizuar me të rinjtë e Shtutgartit, për të kaluar më pas në skuadrën e parë.
Po ashtu, shtatlarti ka luajtur edhe në Greqi, me Panathinaikosin, dhe më pas u transferua në Portugali tek Benfica. Në fund të këtij edicioni futbollistik do të mësojmë më tepër për të ardhmen e Odysseas Vlachodimos. Një gjë është e sigurt. Ndër vite, Atletico Madrid ka treguar se nuk gabon në përzgjedhjen e portierëve
